ភ្នំពេញ៖ ក្រសួងធនធានទឹក និងឧតុនិយម បានចេញសេចក្តីជូនដំណឹងនៅថ្ងៃនេះថា ចាប់ពីថ្ងៃទី០៩ ដល់ថ្ងៃទី១៥ ខែតុលា ឆ្នាំ២០២២ កម្ពុជាបន្តធ្លាក់ភ្លៀងពេញមួយផ្ទៃប្រទេស លាយឡំផ្គរ រន្ទះ និងខ្យល់កន្រ្តាក់។

សា្ថនភាពនេះបណ្តាលមកពីកម្ពុជាស្ថិតក្នុងតំបន់ប្រសព្វរវាងទ្រនុងសម្ពាធខ្ពស់ពីចិន និងជ្រលងសម្ពាធទាប ដែលរុញច្រានពីភាគខាងក្រោមនៃសមុទ្រចិនខាងត្បូង។ នៅថ្ងៃទី១៣ ខែតុលា កម្ពុជាក៏នឹងកើតមានសម្ពាធទាបសកម្ម (Active Low) មួយដើរចូលមកលើភាគអាគ្នេយ៍នៃប្រទេសវៀតណាម។

នៅតាមបណ្តាខេត្តនៃខ្ពង់រាបភាគឦសាន និងពាយព្យជាប់ជួរភ្នំដងរែក នឹងអាចមានភ្លៀងធ្លាក់ក្នុងកម្រិតពីតិចទៅមធ្យម។

ក្នុងរាជធានីភ្នំពេញ និងបណ្តាខេត្តដទៃទៀតនៅភាគខាងក្រោម នឹងអាចមានភ្លៀងធ្លាក់ក្នុងកម្រិតពីមធ្យមទៅច្រើន លាយឡំផ្គរ រន្ទះ និងខ្យល់កន្ត្រាក់។

នៅលើផ្ទៃសមុទ្រចាប់ពីថ្ងៃទី១៣ដល់ថ្ងៃទី១៥ ខែតុលា ឆ្នាំ២០២២ នឹងអាចមានសភាពអាប់អួរ ដោយមានភ្លៀងលាយឡំនឹងខ្យល់បក់បោក និងកំសួលរលកសមុទ្របង្គួរ។

ក្រសួងធនធានទឹក និងឧតុនិយម អំពាវនាវដល់ពលរដ្ឋ អាជ្ញាធរដែនដី ស្ថាប័នពាក់ព័ន្ធ បង្កើនការប្រុងប្រយ័ត្នចំពោះហានិភ័យណាមួយដែលកើតឡើងជាយថាហេតុ៕